2019/2020 ўқув йили шиори: «ЖАНГОВАР РУҲНИ МУСТАҲКАМЛАШ ҲАМДА ЖАНГОВАР ВА КАСБИЙ ТАЙЁРГАРЛИКНИ ОШИРИШ – ҲАР БИР ҲАРБИЙ ХИЗМАТЧИНИНГ ВАЗИФАСИДИР!»

НУКУСЛИК ТЕМУРБЕКЛАР

Нукус шаҳар халқ таълими бўлимига қарашли 44 та умумтаълим мактабнинг 10-11-синф ўқувчилари ўртасида «Темурбеклар» ҳарбий-спорт мусобақаси бўлиб ўтди.

Ўқувчи ёшларни ҳарбий-амалий спорт мусобақаларига кенг жалб этиш орқали бўш вақтини мазмунли ўтказиш, ватанпарварлик туйғусини шакллантириш ҳамда ҳарбий хизматга тайёрлаш мақсадида Ўзбекистон Республикаси Мудофаа вазирлиги ҳамда Ўзбекистон ёшлар иттифоқи Марказий кенгаши ташаббуси билан республика бўйлаб ўтказилаётган «Темурбеклар» ҳарбий-спорт ўйинлари нукуслик ёшларнинг ҳам севимли мусобақасига айланиб улгурди. Юзлаб ўқувчилар иштирок этган беллашувнинг шаҳар босқичида улар «Моҳир мерган», «Тўсиқлар оша югуриш», «Биринчи тиббий ёрдам кўрсатиш», «Саф қўшиғи», «Топография» каби тўққиз шарт бўйича беллашдилар. Қизғин давом этган мусобақада ўқувчиларимиз соғлом турмуш тарзига риоя қиладиган, дастлабки ҳарбий ва психологик тайёргарликка эга, масъулиятли, қийин ва экстремал вазиятларда тўғри ҳаракатлана оладиган авлод бўлиб вояга етаётганликларини намойиш қилдилар.

Мусобақанинг якуний натижаларига кўра, ақл-заковат, топқирлик, эпчиллик ва илк ҳарбий кўникмалар бўйича Нукус шаҳар 24-умумтаълим мактабининг «Лочин» жамоаси 1-ўринни эгаллаб, эсдалик совғалар ва диплом билан тақдирланди. Нукус шаҳар босқичининг мутлақ ғолиби бўлган бу жамоа «Темурбеклар» ҳарбий-спорт мусобақасининг Қорақалпоғистон Республикаси босқичига йўлланма олди.

Н. АСЕНОВ

Информеры